“Sağlamlığımız milli həmrəyliyimizdədir” aksiyası gənclərin fəallığı ilə davam edir

Yeni Azərbaycan Partiyası tərəfindən keçirilən “Sağlamlığımız milli həmrəyliyimizdədir” aksiyası Gəncədə yüksək fəallıqla davam edir.
 
Sosial izolyasiya tədbirlərinə dəstək verən YAP Gəncə şəhər təşkilatının fəal üzvləri, könüllüləri köməyə ehtiyacı olan, yaşı 65-dən yuxarı tənha insanların evlərinə baş çəkir, onlara koronavirusdan qorunmaq, sağlamlığın müdafiəsi məqsədilə gigiyenik vasitələr çatdırır, xəstəlikdən qorunma yolları ilə əlaqədar maarifləndirici məlumat verirlər.
 
YAP Gəncə şəhər təşkilatından AZƏRTAC-a bildirilib ki, gənclər həmçinin Gəncə Şəhər İcra Hakimiyyətində Konoravirusa Qarşı Mübarizə Qərargahında 24 saat fəaliyyət göstərən (022) 2561504 nömrəli qaynar xətlə əlaqə saxlayan yaşlı vətəndaşların evlərinə gedib, əsas istehlak mallarının, dərman vasitələrinin alınmasında, kommunal ödənişlərin edilməsində və s. kömək göstərirlər.
 
Yaşlı insanlar bu nəcib təşəbbüsə görə gənclərə təşəkkür edib, əhalinin sağlamlığını daim diqqətdə saxlayan, koronavirusun ölkə ərazisində yayılmasına qarşı həyata keçirdiyi operativ mübarizə tədbirlərinə görə Prezident İlham Əliyevə, birinci xanım Mehriban xanım Əliyevaya dərin minnətdarlıqlarını bildiriblər.